Su contu est cuddu de unu Corsicanu chi torrat in bidda poscas de bintighimbe annos bìvidos in Marsiglia. Podet èssere su matessi contu de maicantos torrant a si godire sa pensione. Ma no est gasi. Anton Paulu luego si agatat in mesu de una situatzione sotziale e culturale diferente meda dae su chi bisaiat. E, dae cosas de nudda finas a chistiones de sustàntzia, a bellu a bellu intrat in contos a tesu meda dae s’ideologia sua. Tando, est ladinu chi custu libru testimòniat sa Còrsica de oe, cun s’atualidade sotziale e polìtica ma finas cun sa bida de semper, rapresentada dae Bastia, protagonista e isfundu de custu romanzu, chi est una decraratzione de amore pro sa Còrsica, sa gente sua, sa limba sua, sa cultura sua e finas pro s’òpera lìrica.
Custu est su segundu libru de sa colletzione “paberiles” pro su progetu internatzionale Medi Terra, nàschidu pro acurtziare sas literaduras de Catalugna, Còrsica e Sardigna.
